তুমি কুশলে থাকা

কিছুদিন ধৰি
দেশৰ সীমান্ত অঞ্চলত
অহৰ্নিশে চলিছে সংঘৰ্ষ

সংঘৰ্ষপীড়িত অঞ্চলৰ পৰা
আজি তোমাৰ মাতটো শুনিছিলো
চেপা উত্তেজনাৰে ভৰা
দুৰ্গম বাটটোৰে
যাত্ৰা কৰিছিলা তুমি

অথচ তোমাৰ মাতটো আছিল
অত্যন্ত উছাহেৰে ভৰা
যেন তুমি কোনো
ফুলৰ উপত্যকাতহে
বিচৰণ কৰি আছা

উপত্যকা ভৰি ফুলি থকা
ফুলবোৰৰ দৰেই
তোমাৰ হূদয়ৰ উলাহ
আৰু সুৰভিৰ দৰে
তোমাৰ কথাবোৰৰ আন্তৰিকতা

তুমি কুশলে থাকা
মই দূৰৈৰ পৰা ছটিয়াইছোঁ
শুভকামনাৰ ফুল
লগতে পঠিয়াইছোঁ
এছাটি ভিজা বতাহ

হৃদয়ৰ উষ্ণতা, ফুলৰ সৌৰভ
মনৰ হেঁপাহ, সকলো কঢ়িয়াই
যিয়ে এইমাত্ৰ
তোমাৰ কাষলৈ উৰি যাব
উত্তৰ পূব ভাৰতৰ
ভিজা বতাহছাটিক
জিৰণি ল’বলৈ দিবা
তোমাৰ বুকুৰ মাজত

ভিজা ভাববোৰ
বুকুৰ উমেৰে শুকুৱাই
বৰফগলা নদীখনৰ পাৰতে
অলপ পৰ জিৰাবা

তেতিয়ালৈকে নিশ্চয়
সংঘৰ্ষপীড়িত গোটেই উপত্যকা
শান্ত হৈ পৰিব৷